2016. GODA KULTURYS BOLVYS „BOŅUKS“ NOMINANTU DORBU RAKSTURUOJUMS LITERATURĀ

Oskars Orlovs

Abstract


2016. gods latgalīšu kulturā beja īvārojams ar vairuokim dasaceitim dorbim literaturā: divuos nominacejuos „Lobuokais snāgums literaturā“ i „Lobuokais izdavums/gruomota“ tyka dasaceiti septeni nominanti, nu tim taišni literaturā: Annele Slišāne „stāsti #100dečiLatvijai“, Dagnija Dudarjonoka, Gunta Nagle, Ligija Purinaša, Jana Skrivļa-Čevere „Linejis“ (dzeja), Ineta Atpile-Jugane „Mūdynuot muokuļus“ (dzeja), Raibīs „Zalta tesmini“ (stuosti), Sandra Ūdre, Juoņs Ryučāns „Aizlauztais spaits“ (Fraņča Kempa dzeivis atspeidynuojumi). Par „Lobuokū snāgumu literaturā“ tyka pīzeits Juoņa Ryučāna i Sandrys Ūdris saraksteitais romans „Aizlauztais spaits“. Nominacejā „Lobuokais izdavums/gruomota“ Boņuks datyka gruomotai i audio diskam „Škilbanu sīvas“ (autoris – Edeite Husare, Anda Beitāne). Pietejumā ir raksturuots literaturys nominantu snāgums: stils, idejis, adresats (kas i kaids dūmuots gruomotys skaiteituojs. Latgalīšu literatura ir samārā dažaida, kotram autoram juo dorbūs pasaruoda taišņi jam rakstureiguos īzeimis i sovumi. Debejis daiļdorbim varātu skaiteituoju byut vaira. Tuos ir Latgolys lokalisma eipatneibys, kur (ari kai vysā Latvejā) grākoj ar taidu tendeņci, ka autora poša biografeju pīleidzynoj juo daiļdorbam. A. Slišānis stuosteni ir publicāti juos facebook.com profilā latvīšu i latgalīšu literarajā volūdā. Kotrs pastuosts vaira ir kai mozs emuars, atmiņu tāluojums. Tys eisti naatbylst dūtajam žanra nūsaukumam i eisti par literaturu tū nūsaukt ir pagryuši. D. Dudarjonokys, G. Naglis, L. Purinašys, J. Skrivlis-Čeveris dzejis kruojums pīsaista ar tū, ka latgalīšu literaturā tys ir pyrmais kruosojamais dzejūļu kruojums. Četru jaunu autoru kolektivs, kur kotra nu ailineicom izaceļ ar sovu, sīvīšu, pasauļa redziejumu. Vysam dzejis kruojumam cīši rakstureigi ir kontrasti. Divom autorem (L. Purinašai i G. Naglei) tei ir debeja latgalīšu literaturā. I. Atpilis-Juganis dzejis kruojums „Mūdynuot muokuļus“ ir jau catūrtuo ailineicys gruomota. Gruomota pīsaista na viņ dzejis meiļuotuojus, bet i muokslys baudeituojus plotuokā nūzeimē – izvālāti originali i viereibu saistūši dizaina elementi. Dzejā dominej meditativuo lirika i sīvītis pasauļa dziļums. Itys ir ūtrais Raibuo stuostu kruojums. Raibīs roksta ironiski sarkastiskā stilā. Vītom var pamaneit karnevalizacejis elementus, maskys i pateibys vaicuošonys arhetipus i postmodernismam rakstureigū spēlis pryncypu. Kai jau i veirīšu tāluotā pasaulī, gruomotā vīta atsaroduse i varys dorbim, i kaisleibom. S. Ūdris, J. Ryučāna dorbs „Aizlauztais spaits“ ir veļteits latgalīšu politikam i sabīdryskajam darbinīkam Fraņčam Kempam. Dorbs, kurā na vysā organiski mejās diveji stili: biografiskais, emocionalais i viesturiskais, publicistiskais. Daildorbā izmontuoti damiersti latgalīšu volūdys vuordi i formys, redzīs, tei ir vysu leluokuo dorba vierteiba, tok nasagataveitu skaiteituoju taišni tys var atbaideit. 2016. goda davums latgalīšu literaturā ruoda, ka poteņcis jaunajim i videjuos audzis raksteituojim ir, tys ļaun cerēt, ka latgalīšu literatura atsateista.

Keywords


latgalīšu literatura; latgalīšu kuļturys goda bolva „Boņuks“; styls; adresats

Full Text:

PDF


DOI: http://dx.doi.org/10.17770/latg2017.9.2733

Refbacks

  • There are currently no refbacks.